Austevoll folkebibliotek

Sommar på biblioteket

2011-06-03T14:53:00.003+02:00

Våren kom og gikk, og no står sommaren for døra. Denne fredagen yrar det av liv i biblioteket. Mange barn og vaksne er innom, skuleungane har visst fri frå skulen. Mange hyttefolk har og teke turen ut til vårt kjære øysamfunn, og det er difor mange ukjende fjes å sjå.

Foto: Ingrid Kristine Sollid

Utlån og besøk aukar, og Playstation og datamaskiner blir flittig brukt. I aviskroken får dei vaksne eit avbrekk frå handlerunden, og kan slappe av med ein kopp kaffi og mellom anna lesa lokalavisa Marsteinen, som kom i dag.

Sommaren er den tida då lokalsamfunnet blømer opp her, og folketalet nær doblar seg. Og no ser det jammen ut til at vergudane er med oss og.

Det kjem ei sending med bøker for barn og unge, og bibliotekaren registrerer dei i ledige stunder. Det er alltid kjekt med noko nytt i hyllene, og no er det vampyrseriar for ungdom som er "in" i tida.

Ei av bøkene for ungdom som kom i dag heiter "Mørketid" av Åshild Moldskred. Ifølge vaskesetelen er dette "En bloddrikkerroman om dystre hemmeligheter, uforutsigbare fiender og håpløs forelskelse". Bra mix, det! Sommaren er jo ei fin lesetid, og. Ein kan til dømes sitja ute på terrassen og nyte sola og varmen og i tillegg få med seg spenninga i ei god bok.

For dei som ikkje les så mykje har biblioteket sjølvsagt mange gode filmar og lydbøker å by på. Det er gratis å låne, og på biblioteket får du gratis nasjonalt lånekort som kan brukast i omlag alle norske bibliotek. Det som ikkje alle er klar over, er at ein kan faktisk låne bøker ein stad, og levere ein heilt annan stad. Så om du låner "Sommeren uten menn" av Siri Hustvedt hos oss, så kan du levere den inn på neste stopp på båtturen din, til dømes på Bømlo? Og der kan du igjen låne med deg nye bøker av heilt andre forfattarar som du kan levere på neste plass på di ferd! Genialt, kva?

Og sånn går no sommaren...

Du er kjempe, kjempe, kjempe kul!

2011-05-20T20:37:00.003+02:00

I går kom det ein gjeng med leande jenter inn i biblioteket. Dei gjekk ned i barneavdelinga og sette seg der og flirte og prata. Etter ei stund kom eit par av dei bort til bibliotekaren i skranken og ville (småfnisande og raudletne) vite kva bibliotekaren heiter. Og bibliotekaren, ho heiter Laila. Og dette svaret var dei nøgde med. Etter ei stund gjekk dei ut. Og bibliotekaren tenkte ikkje meir over dette. Før i dag.

Bibliotekaren kom tidleg på jobb og sette i gang med morgonrutinane, som mellom anna inneber å sette over kaffe og tømme kassene med innlevert materiale. I dag var det ingen bøker i kassen, derimot låg det fleire ark der, med fargerike teikningar av sauar og hjarte, og desse var forma som små brev til bibliotekaren. "Til Laila, the Bibliotekar!" Dei må ha hatt det morosamt, jentene. Dei skriv mellom anna at biblioteket "eige sjukt", og dei elskar den pene (!) og kjempekule bibliotekaren! Og ikkje nok med det, dei elskar å bruke PC-ane og digge filmane, bøkene, lydbøkene og blada. Bibliotekaren ler godt, men tek dette til seg for alt det er verdt!

Brev til bibliotekaren. :)

Masse hjarte!

I dag tek bibliotekaren og sett alle plantene i biblioteket i ein stor kasse og tek dei med heim. Dei må plantast om før dei sprengjer seg ut av pottene. Dei har jo formert seg og, så då blir det endå meir grønt i det frå før svært fargerike biblioteket.

Og så kjem yndlingspostmannen til bibliotekaren inn døra med pakke full av nye bøker og lydbøker! Då må berre neste blogginnlegg handla om nye bøker og omtale av desse. Men i dag er bibliotekaren i vårstemning, og har nok med å konsentrere seg om å registrere bøkene og få dei ut på hylla. Laila, the bibliotekar, den kjempekule, ynskjer alle ei god helg!

Statistikktider

2011-05-09T19:53:00.000+02:00

Våren, for ikkje å seie sommaren, er komen for fullt. Temperaturen er innstilt på full sommar, og sola skin nådelaust inn gjennom vindauga på biblioteket der bibliotekaren sit nedstøva og sveitt og jobbar med den årlege statistikken som må inn no. Skjema for ditt og skjema for datt. Nokre endringar er det og i malen sidan i fjor. I alle fall er det endringar i aktivitet og utlån. Det er gledelege tal for det meste, så bibliotekaren gler seg til alt er ferdig utfylt og får sjå "resultatet" for fjoråret svart på kvitt. Men enno gjenstår ein del, og biblioteksystemleverandøren lyt trø til med hjelp til nye lister.

Av og til lyfter bibliotekaren blikket frå skjermen og alle arka som er strødd utover skranken, og lengtar etter å kome seg ut i sola. Til slutt er dagen til endes, og nokre fleire problem løyste. Deadline er heldigvis ikkje i dag.

Førre veke var det eit hyggeleg avbrekk i den daglege tralten, då bibliotekaren var på studietur til Sølvberget i Stavanger i lag med dei andre bibliotekarane i Sunnhordland. Det var foredrag og omvisning, og alle deltok på debatt på Kult.kafeen. Umiddelbart var det vel ikkje noko som hadde direkte overføringsverdi til vårt vesle folkebibliotek, men det er verdfullt å treffe kollegaer og lufte problem og finne løysningar på ting. Og kanskje kjem det til å komma noko ut av samarbeidet denne gongen og. Den som følgjer med får sjå.

Bibliotekaren lengtar ut i sola

Vårsjau

2011-04-28T17:18:00.000+02:00

Så snart påska er over sett bibliotekaren i gang igjen med rydding i samlingane. I dag var det rokering og rydding av skjønnlitteratur for ungdom som sto på tapetet. Det flotte veret gjer sitt til at folk heller er ute og kosar seg i staden for å sitte inne og lese, så då blir det tid til dette. Det er ikkje så mange hyller med denne sorten litteratur, heller. Og resultatet vart bra. Det vart betre plass i hyllene, og fleire bokpermar kunne vendast ut mot publikum i staden for at ein ser stengde bokryggar. Ungdom kan vera vanskeleg å få til å lesa noko som helst, så det er viktig at bøker og anna materiale vert eksponert der dei går.

Besøk og utlån går elles meir opp for kvart år no, og det er fint at ungdom, som barn og vaksne, bruker biblioteket sitt som møteplass. Og takka vere at ein fekk litt meir på mediebudsjettet har ein kunna kjøpe inn litt av det som ungdommen kan tenkjast å ville lese og.

Difor nyttast høvet her til å reklamere særleg for ei bok for ungdom i dag: Uglies av Scott Westerfeld.

Tally Youngblood gler seg til ho snart fyller 16 år. Då skal ho endeleg få flytte frå internatet i Styggby til Festlivet i Penby som ligg på andre sida av elva. Der kan ho leve livet i sus og dus, og få plastiske operasjonar til ho får perfekt utsjånad, som dei andre i Penby. Alle blir like vakre, for det er mest rettferdig. Men så vert Tally veninne med Shay, og får høyre om eit anna samfunn som heiter Røyk. Dit rømmer ungdom som ikkje vil opererast, som vil leva naturleg og eldast naturleg. Shay vil ha med seg Tally til Røyk, men Tally tykkjer det høyrest skræmande ut. Ho vil flytte til Penby og feste og ha det moro saman med andre ungdomar. Men når Shay forsvinn byrjar Tally å få ein mistanke om at ikkje alt i Penby er så perfekt som alle skal ha det til.

Dette er ei spanande og aktuell bok, som like gjerne og kan lesast av vaksne.

Etter å ha fått både denne og andre aktuelle ungdomsromanar ut på hyllene skal vårsjauen fortsette fram igjennom. Bøker som vert teke ut av samlinga vert lagt ut for sal. Dei kostar berre 5 kroner pr. stk. Og kjøper du utgåtte bøker så hjelper du biblioteket til å kjøpe fleire nye medier! Og kom gjerne med boktips til bibliotekaren om kva du meiner biblioteket skal innehalde, både av bøker, lydbøker, filmar og anna. Me lovar ikkje å kjøpe inn alt, men kjøper inn så langt budsjettet rekk. Og hugs også at du kan be bibliotekaren låna bøker inn frå andre bibliotek om me ikkje har den i samlinga sjølv. Dette gjeld likevel ikkje for ny skjønnlitteratur, det vil seie populære bøker som er utgjevne i fjor eller inneverande år. God lesevår!

Snart påske!

2011-04-09T19:43:00.000+02:00

Alle born under 15 år som kjem til biblioteket kan skrive seg på ei liste om dei har lyst til å vinna eit supert påskeegg å kosa seg med i påska! Berre å skriva opp namn og telefonnummer, så er du med i trekninga. Vinnaren blir trekt og kontakta eit par dagar før påske.

Opningstidene er som vanleg til og med onsdag før skjærtorsdag. Biblioteket er stengt også på påskeaften, så du må sikre deg filmar, musikk og lesestoff før kl. 15.00 på onsdag den 13. april. Vanlege opningstider igjen frå og med tysdag 26. april. Me ynskjer alle ei flott og solrik påske!

Koseleg besøk

2011-04-07T20:37:00.000+02:00

Forfattarmøtet med Hilde K. Kvalvaag vart eit hyggeleg og ganske intimt arrangement på biblioteket. Cirka 10 personar hadde møtt fram for å høyre på henne. Hilde klarte å skape ein fin dialog med publikum, og latteren satt laust. Det vart snakka om alt frå strileidentitet og oppvekst til barneoppdragelse og framandkjensle. Og på kva måte erfaringar og konkrete hendingar inspirerer og initierer skriving. Hilde beskriv seg sjølv som realist, og prøver å legge seg så nær opp til ei sanning som mogleg når ho skriv.

Vår ute og inne

2011-04-04T16:44:00.003+02:00

På folkebiblioteket har våronna starta med kassering av gamle bøker og rydding og flytting for å få plass til nytt. Når oppgåvene er mange, så blir det skippertak når større oppgåver har venta for lenge. Ute er det også vår, og me har teke fram hagebøkene. Tips og inspirasjon til hagearbeid trengs. For mange er dette noko ein ventar på med glede, når alt byrjar å spire igjen.

Inneplantene skal og ha litt stell. På biblioteket har me nokre planter som me prøver å stelle med. Fleire av dei har vi faktisk fått av gode lånarar. Dei gjer sitt til det fargerike inntrykket du får av bibliotekrommet når du trer inn glasdøra.

Mange som kjem innom biblioteket for første gong gjev uttrykk for at dei tykkjer det er svært koseleg og imøtekommande stemning i bibliotekrommet. Blomane har me fått frå lånarar som meiner dei er blitt møtt med god service, og slikt er sjølvsagt svært kjekt å høyra for dei tilsette i biblioteket. Og dette blir me minna på kvar gong me vatnar og steller med desse plantane.

I dag var det så fin vårstemning, så bibliotekaren let seg inspirere til å finne fram eit vårdikt.

FORBEREDELSER

Våren, sier vinteren fortørnet.

Den grønne våren

er jo over på et øyeblikk!

Det er å tenke den ut

av det hvite som tar tid.

(Karin Sveen, frå "Det tålmodige landskapet", 1998)

Endeleg - ny nettside for biblioteka i Sunnhordland

2011-03-31T17:37:00.000+02:00

Austevoll folkebibliotek er med i eit samarbeid med dei 7 andre folkebiblioteka i Sunnhordland, og har ei god stund jobba for å få til ei ny, felles nettside. Den gamle heimesida er ikkje lenger i bruk, så du må oppdatere bokmerket ditt for Austevoll folkebibliotek. Den nye nettsida finn du her:

http://www.sunnbib.no/

Der ser du og den nye felles logoen for biblioteka. Me håper at dette samarbeidet skal verta fruktbart på fleire område, mellom anna på kompetanseheving, fagleg nettverk og samarbeid om arrangement for publikum i biblioteka. Det vil koma nyhende og bokmeldingar jamnleg, så ver ofte innom og følg med. Sidene vil alltid vera oppdaterte med omsyn til opningstider, kontaktinformasjon og arrangement.

Forfattarmøte på folkebiblioteket

2011-03-30T18:39:00.000+02:00

Hilde Kvalvaag vann årets Bragepris 2010 for barne - og ungdomslitteratur, for boka "Fengsla". Kvalvaag har først og framst vore kjent som forfattar av bøker for barn og unge. I 2008 debuterte ho også som vaksenbokforfattar, med romanen Skagerrak. Den er ein stemningsfull og vagt urovekkande roman frå ope landskap ved Skagerrak. Der skildrar ho kjensler gjennom sjøskap, og sjøskap sin lunefulle karakter. Kvalvaag har vunne fleire prisar, som Kulturdepartementet sin pris for barne - og ungdomslitteratur.
Torsdag den 7. april kl. 17.00 kjem Hilde Kvalvaag til folkebiblioteket for å fortelja om forfattarskapen sin, og korleis ho får inspirasjon til å skriva.

Gratis adgang, alle velkomne! Lokal arrangør er Liv og Lyst.

2010-11-08T17:03:00.000+01:00

Forteljarstund på biblioteket:

KIRSEBÆRTREETS HEMMELIGHET

Eit Askepott-eventyr frå Vietnam

Ein mektig konge drøymer ei natt om eit kirsebærtre. Under treet sit ei vakker ung jente med gullsko og gullkjole på. Kongen blir forelska, men når han vaknar, har han gløymt henne...Slik startar eventyret om Jung, den vietnamesiske Askepott. Bli med til søraust- Asia og møt onde stemødrar, flygande fear og magiske dyr. Forteljarstunda varar ein halv time, og passar best for born frå 4 år og oppover.

Om forteljaren:

Liv Brita Brodal arbeider som freelance forteljar, og har i fleire år opptrådt på skulane i Austevoll kommune gjennom Den kulturelle skulesekken. Ho har fortalt på kulturscener og festivalar over hele landet, samt i Sverige, Danmark og Canada. Ho har fortald eventyr i thailandske skular og gjesteforelest om forteljarkunst på indiske universitet. I heimbyen Stavanger arrangerer ho «Eventyrlørdag», forteljarforestillingar for born kvar veke, samt ein månadleg forteljarkafé for voksne. Ho har røter og slekt på Storebø.

Austevoll Folkebibliotek, laurdag 20. november kl. 12.00. Fri inngang.

Forestillinga er støtta av Den kulturelle skulesekken i Austevoll.

Utstillinga "Havet"

2010-09-24T17:57:00.000+02:00

Elevar i 4. klasse ved Selbjørn skule har laga fine bilete med havmotiv. Alle har brukt same teknikken; vassfargar på remser av papir. Alle bileta er forskjellige. I dag var læraren nede på folkebiblioteket for å sette opp utstillinga. Den vart kjempefin. Kom og sjå du og!

Rai-rai!

2010-09-16T12:53:00.003+02:00

Folkebiblioteket er med i eit samarbeid med 7 andre kommunar i Sunnhordland. Dette skal snart resultere i ein felles flott ny nettstad. Lanseringa av denne nettstaden var planlagt i september/oktober, men av ulike årsaker er dette blitt utsett til byrjinga av november. Men allereie no har vi fått lov til å låna musikk frå Stord folkebibliotek. Austevoll har diverre ingen eigen grunnstamme av musikk på cd, så dette er svært bra for folkebiblioteket. Også mange andre positive følgjer vil dette samarbeidet få med tida. Det gjeld både tilbodet til publikum og tilbod om fagleg nettverk og utvikling for bibliotekpersonalet. Bibliotekaren er i full gang med å registrere og klargjere musikken for utlån! Lånetida på denne typen materiale vil bli 14 dagar, avdi det er begrensa kor lang lånetid vi sjølv får på materialet frå Stord. Med tida håper vi å kunne få eit reelt budsjett til å kunne foreta akkvisisjon av materialtyper som til dømes musikk, spel, blu-ray filmar og andre etterspurte nye medier. Inntil vidare er vi glade for at vi kan låna av andre.

Ny lokalhistorisk bok

2010-08-16T14:19:00.002+02:00

I samband med kystsogehelga i Bekkjarvik hadde Selbjørn fiskerisogelag relansering av ei tidlegare utgjeven bok om fiskaren Nils Djupevåg: På fiske i sytti år. Denne vart første gong utgjeven på eige forlag i 1944, og opprinneleg ført i pennen av Johan Tufteland. Denne nye utgåva er forsynt med eit nytt forord og etterord av Øystein Rabben og Inge Halstensen, og er eit fint tilskot til lokallitteraturen i Austevoll. Boka er illustrert med gamle fotografi.

Og korleis går det med bokormen..?

2010-07-07T17:35:00.000+02:00

Jau takk, berre bra! Det kjem jamnleg folk innom og tek nokre rundar på strikketyet vårt som ligg framme. Og det ser ut som bokormen blir både fargerik og flott! Innimellom er det strikka inn både tre- og plastperler og figurar. Her ein dag var det nokon som hadde sydd på flotte knappar forma som sauer.

Det vil vera mogleg å komme innom og strikke enno ei god stund. Den blir liggande framme utover hausten. Så får vi sjå om den kan bli ferdig til jul og monterast og plasserast i barneavdelinga. Og så må den jo få eit namn! Den saken må vi koma attende til, men det er i alle fall borna sjølv som skal få bestemme kva bokormen skal heite når den er ferdig. Sjå på dei flotte fargane! Det er berre fantasien som begrensar fargeval og mønster her. Og det er artig å sjå kor den veks. No har vi seks ferdige lengder som kvar er over ein meter lang.

Turistkontoret er ope!

2010-06-25T17:59:00.003+02:00

I dag var det offisiell opning av Austevoll turistkontor i folkebiblioteket sine lokalar i Bekkjarvik torg. Det var servering av kaffi og kaker frå Kulturbakeriet og frå Bekkjarvik gjestgiveri. Ordførar Helge André Njåstad var på plass og snakka til dei frammøtte. Det var også folk frå fylkeskulturetaten til stades på arrangementet. Totalt var det ca. 40 besøkande innom i løpet av arrangementet. Anne-Linn Sekkingstad spelte piano, og Sissel Fagerbakke frå turistkontoret delte ut blomar. Ikkje alt var heilt på plass enno, men dette ser ut som det blir eit svært vellukka samarbeid. No startar turistsesongen for fullt, og vi gler oss til sommaren vel rusta til å møte den.

Sommarbiblioteket

2010-06-25T14:12:00.003+02:00

Frå og med måndag den 28. juni er det nye opningstider på biblioteket. Og det er første gongen at det er ope kvar dag heile sommaren. Dette er mogleg avdi ein får høve til å samarbeida med andre. I dette tilfelle Austevoll reiselivslag, som skal driva turistinformasjon i biblioteket.

Dei nye sommaropningstidene er slik: Måndag - fredag kl. 09.00 - 16.00. Laurdag: 11.00 - 13.00.

Kom innom og lån ferielitteratur. Lydbøker er herleg å ha med på biltur. Hugs at du kan få lenger lånetid enn 4 veker dersom du spør om det. Du kan og levere inn bøker som du har lånt ved andre bibliotek, vi returnerer dei til riktig bibliotek for deg.

Siste utstilling før sommaren

2010-06-09T09:54:00.009+02:00

”MÅNADENS BILETE”

Laurdag 12. juni kl. 12.00

Utstilling av måleri: ”Gjeterhund” (akryl på lerret) av Maria Vatnøy

Gratis adgang. Alle velkomne.

Arrangør: Austevoll kulturskule i samarbeid med Austevoll folkebibliotek

Det nærmar seg ferietid, og biblioteket har reisetips til alle og ferieguidar og filmar til utlån. Nokre av desse har vi stilt ut. Biblioteket abonnerer og på tidsskriftet Vagabond, som har mange interessante artiklar for den reiselystne. Så det er berre å kome innom og bla i bøker og blad og drøyme seg bort!

Fleire bokgåver

2010-06-04T12:02:00.000+02:00

Med eit mildt sagt lite mediebudsjett er gåver frå brukarane av folkebiblioteket svært velkome. Og i det siste har vi fått også ein del engelske bøker, både nye og eldre, frå ein av våre lånarar. Dette er ekstra kjærkome no når turistsesongen snart er over oss for fullt. Bibliotekaren har hatt sin glade, fulle hyre med å registrere bøkene og klargjere dei for å få dei ut på hylla. Så det som i utgangspunktet berre var ei lita glissen hylle med gamle pocketbøker er no blitt oppdatert til å verta ei brukbar samling av romanar på engelsk for vaksne. Så hylla har faktisk vorte for liten, så bibliotekaren må no sjå seg om i lokalet etter alternativ plassering for denne delen av samlinga.

Aktuell bok

2010-05-19T10:33:00.001+02:00

Fiskerisogelaget har si samling av bøker ståande på folkebiblioteket. Dei kjøper av og til inn nye og aktuelle bøker, og no har dei kjøpt inn denne: Hitlers dødelige testament, av Hans-Joachim Schilde. Den handlar om ubåten U-864 som vart senka utanfor øya Fedje i 1945.

Frå "vaskesetelen":
"Dette er den dramatiske beretningen om den tyske gigant-ubåten U-684 som i februar 1945 ble torpedert av den britiske ubåten HMS Venturer. U-864 sank utenfor øya Fedje nordvest for Bergen, og besetningen på 75 mann omkom, deriblant noen av Adolf Hitlers fremste vitenskapsmenn.

Ubåten var på vei til Japan med forsvarshemmeligheter som var en del av det tysk-japanske militære samarbeidet. Den inneholdt også 65 tonn kvikksølv som fremdeles ligger på 150 meters dyp utenfor Fedje - kvikksølvet er Hitlers dødelige testament.

Første del av boken tar for seg begivenheten som ledet fram til torpedereingen i 1945. Andre del omhandler nåtiden. I minst 11 år har sentrale instanser i Norge visst om kvikksølvet. Det ligger fortsatt på havbunnen og kan sies å være Norges mest pinlige miljøbombe. Dette er bakteppet for en beretning som er like rystende som den er spennende."

Boka er til utlån.

Lånarane anbefaler!

2010-04-28T16:04:00.002+02:00

Turid Veivåg har lese denne boka, og vil gjerne anbefale den til andre lesehestar:

Fra "vaskeseddelen":

"Denne historiske romanen spenner over 60 år i annen halvdel av 1700-tallet. Leseren tas med til livet i en vest-afrikansk landsby, en plantasje i de amerikanske sørstatene, Halifax på den kanadiske østkysten, Freetown i Sierra Leone og slaverimotstandernes høyborg i London. Aminata Diallo blir bortført som 12-åring og tvinges fra sitt afrikanske hjemland om bord på et slaveskip på vei til South Carolina. Senere blir hun vidersolgt, men greier å rømme i New York. Hun lokkes til Nova Scotia, men der venter enda flere brutte løfter. Romanen bygger på en lang rekke historiske kilder."

Gledesstrålande fortel Turid at ho i det siste har funne det eine lykketreffet etter det andre når ho har vore på biblioteket. Denne boka gjorde at ho vart svært engasjert, og handlinga og personane i boka vart svært levandegjort for henne. Ho vil anbefala denne boka til andre, og gjerne på bibliotekbloggen!

Har du ei yndlingsbok eller ei bok som har gjort inntrykk på deg?

"KEM" ?

2010-04-27T17:36:00.002+02:00

”KEM”

KJEM TIL AUSTEVOLL FOLKEBIBLIOTEK

Kari, Elna og Mons

vil spela og syngja på biblioteket tysdag den 4. mai kl. 18.00.
Dei spelar på gitar og trekkspel og syng gamle slagerar!

Alle velkomne! Gratis adgang.

Arrangør: Venner av biblioteket

Minikonsert og ny utstilling

2010-04-14T11:22:00.002+02:00

Førstkomande laurdag vil elevar frå Austevoll kulturskule halde ein minikonsert i folkebiblioteket i samband med avduking av ny utstilling. Dette er den siste utstillinga kulturskulen har før sommarferien. Utstillinga denne gongen har fått namnet "Figurative motiv". To av elevane stiller ut sine arbeid; Susann Sekkingstad og Maria Vatnøy. Dei har laga teikningar, akvarellar og også brukt blandingsteknikkar. Alle er velkomne til å sjå og oppleve dette på laurdag frå kl. 12.00. Det er gratis adgang.

Når du no først er komen til folkebiblioteket, så kan du jo også sjå på utstillinga vår av hagebøker. Mange har alt byrja å "ruske opp" i hagane sine og brenna gamalt lauv. Det fine veret som har vore i det siste har gjort fjorårshagane synlege. Då er det kjekt å kanskje kunne bla litt i bøker og få inspirasjon til nye ting du kan gjera med hagen!

Wiii!!!

2010-03-28T16:38:00.002+02:00

På laurdag fekk folkebiblioteket Wii-spel og Playstation 3 i gåve frå Vital. I tillegg hadde Liv og Lyst i Austevoll gjeve ein stor flatskjerm, slik at no kan biblioteket arrangera speleturneringar for alle! Ordføraren og prosjektleiaren for Liv og Lyst hadde teke turen til Bekkjarvik for å avduke gåva, og sjå den i bruk. Og dette var det tydeleg at ungane kjende til frå før, for det varte ikkje lenge før det var full boksekamp i biblioteket!

Austevoll kommune sin kulturpris for 2009 vart ved same høve utdelt til ein som har gjort ein stor innsats som trenar i fotball for gutar og jenter. Han fekk blomar og godord frå ordføraren, og vil også motta ein sjekk som påskjøning for alt arbeidet han har lagt ned.

Geir Veivåg fekk Austevoll kommune sin kulturpris for 2009 overrekt frå ordførar Helge André Njåstad.

Påsketid

2010-03-23T14:04:00.001+01:00

Siste opningsdag før påske vert onsdag 31. mars frå kl. 9.00 - 12.00. Deretter blir det stengt frå og med 1. april til og med 5. april. Så skund deg til folkebiblioteket og fyll opp sekken med påskelektyre! Riktig god påske til alle våre lånarar!

Ny utstilling ved elevar frå kulturskulen

2010-03-11T10:39:00.002+01:00

Førre gong elevane hadde utstilling på folkebiblioteket var ein suksess med rundt 40 frammøtte som kom og deltok. No er det igjen tid for utstilling av Månadens Bilete, og førstkommande laurdag kl. 12 vert utstillinga avduka. Kulturskulen har fått fast plass i biblioteket, og vil jamnleg stille ut arbeid. No på laurdag vert det i tillegg underhaldning ved gitarelevar frå kulturskulen. Det blir enkel servering i samband med arrangementet. Vi gler oss!

Her er nokre bilete frå utstillinga som var den 13. februar.

Nytt samarbeid: folkebibliotek/turistinformasjon

2010-03-04T08:48:00.000+01:00

Frå møteprotokoll i formannskapet 2. mars:

Handsaming i møtet:

Framlegg frå Frp v/Helge Andre Njåstad:

(Ynskje at saka går til kommunestyret då det er prinsippielt om kommunen skal inngå eit slikt

samarbeid og ei sak som gjerne kommunestyret og kan ha synspunkt på – pluss at avtala kan

utarbeidast i mellomtida).

Austevoll kommunestyre vedtek at Austevoll kommune inngår samarbeid med Austevoll

Reiselivslag om etablering av turistinformasjonskontor i biblioteket i Bekkjarvik Torg.

Austevoll kommunestyre løyver 50.000,- til etableringstilskott / driftstilskott for 2010.

Tilskottet er finansiert av næringsfondet.

Austevoll Formannskap ber om at det vert forhandla fram avtale med Austevoll Reiselivslag

før kommunestyret har møtet og at denne vert å leggja fram til møtet.

Det vart røysta over tilrådinga frå rådmannen og framlegget frå Frp. Framlegget frå Frp vart

samrøystes vedteke.

Vedtak:

Austevoll kommunestyre vedtek at Austevoll kommune inngår samarbeid med Austevoll

Reiselivslag om etablering av turistinformasjonskontor i biblioteket i Bekkjarvik Torg.

Austevoll kommunestyre løyver 50.000,- til etableringstilskott / driftstilskott for 2010.

Tilskottet er finansiert av næringsfondet.

Austevoll Formannskap ber om at det vert forhandla fram avtale med Austevoll Reiselivslag

før kommunestyret har møtet og at denne vert å leggja fram til møtet.

Årsmelding 2009

2010-02-25T08:36:00.000+01:00

Årsmelding 2009 Austevoll folkebibliotek.

I januar starta bibliotekarane jobben med å flytte og samlokalisera folkebiblioteket i Bekkjarvik torg, slik som vedteke i kommunestyret i desember 2008. I møtet vart det også vedteke at ressursane skulle fordelast 70/30 på folkebibliotek og skulebibliotek. Dette førte til at ein sum tilsvarande meir enn folkebibliotektenesta sitt samla mediebudsjett vart teke vekk frå folkebibliotekbudsjettet og overført til ungdomsskulen fordi skulebiblioteket skulle få eit mediebudsjett. Folkebiblioteket hadde inntil då hatt 105.000 kroner i årleg mediebudsjett etter at det vart nesten halvert i 2006. Inntil 2005 hadde det vore på 190.000 kroner i året. I tillegg vart folkebiblioteket pålagt å spara inn ytterlegare 50.000 kroner kvart år på driftsbudsjettet for å ta inn igjen eit overforbruk på 200.000 kroner som oppsto i samband med flytting av den eine bibliotekeininga i 2007.

Over halvedelen av alle tidsskriftabonnement vart oppsagde for å spara pengar. Mest alle faglitterære og skjønnlitterære bøker for ungdom ved eininga på Eidsbøen vart gjevne til ungdomsskulen. Mest alle skjønnlitterære og ein del faglitterære bøker for barn ved eininga på Eidsbøen, pluss ein del utstyr, vart fordelt på barneskulane. Som eit resultatet av vedtaket hadde såleis folkebiblioteket i utgangspunktet ikkje lenger noko mediebudsjett, og sat att med ei svært mangelfull samling som og langt på veg var utdatert.

Det vart bevilga litt ekstra pengar til løn og ein liten sum til bøker i samband med at biblioteket for første gong skulle ha ope i juli. Tidlegare har folkebiblioteket kun hatt laurdagsope denne månaden. Denne summen til bøker vart seinare inndregen igjen for å spare. I tillegg måtte alle sett med kulturfondbøker seiast opp etter sommaren. Alt dette har igjen gått ut over skulane, som av denne grunn ikkje har fått rabatt på innkjøp av bøker frå Biblioteksentralen.

I samband med flyttinga og innreidinga av folkebiblioteket i Bekkjarvik var biblioteket stengt med unntak av 5 timar kvar laurdag i perioden 15. januar til 1. april. Etter nyopninga vart det mykje meir opningstider. Opningstidene som vart gjeldande er slik:

Måndag: Stengt (kontordag/til avspasering)

Tysdag: 09.00 – 19.00

Onsdag: 09.00 – 15.00

Torsdag: 09.00 – 19.00

Fredag: 09.00 – 15.00

Laurdag: 11.00 – 13.00

Dette er 34 opningstimar pr veke. Personalressursane var fram til sommaren 1, 4 årsverk pluss laurdagsvikarar. I tillegg reinhaldar i 6,67 % stilling.

Sommaropningstidene i juli var slik:

Tysdag: 11.00 – 14.00

Onsdag: 11.00 – 14.00

Torsdag: 11.00 – 14.00

Laurdag: 11.00 – 13.00

Etter sommaren fekk bibliotekmedarbeidaren permisjon for å fungere i nyoppretta stilling som skulebibliotekar ved ungdomsskulen. Biblioteksjefen fekk då i oppgåve å tilsette vikar og ansvaret for opplæringa i arbeidstida. Samstundes vart personalressursane innskrenka til å omfatte laurdagsvikarane, på den måten at dei vart innrekna i det ordinære lønsbudsjettet. Det vil seie at bibliotekmedarbeidaren er midlertidig tilsett i 20,67 % stilling (mot før 40 %). Resten av stillinga vart gjort om til å dekkja laurdagsvikar og noko ”ledig”, slik at biblioteksjefen kan ta inn vikar når det er leiarmøte ein gong i månaden.

Med desse føresetnadene fekk biblioteksjefen i oppgåve å auka utlån og aktivitet i 2009. Besøkstal har det ikkje vore mogleg å føre noko sikkert tal på før denne tid. Besøkstalet i 2009 var 5.311 besøk. Samla utlån var 8.759 utlån. Dette er ein nedgang på 1772 utlån frå 2008. Dette er akseptabelt når ein tek med at biblioteket var delvis stengt og samlinga nærast utilgjengeleg (i kassar) i to og ein halv månad av året.

Det som har vore gjort for å auke aktivitet og utlån er til dømes etablering av ei gruppe av ”Venner av biblioteket”. Desse har i 2009 hatt fleire arrangement for både barn og vaksne som har bidrege til besøk og bruk av biblioteket. Lokale folk har stilt opp utan vederlag og halde kåseri og eventyrstunder. I samarbeid med kulturskulen har det vore forfattarbesøk med eventyrstund for born. I og med at det ikkje har vore nokon nye media i biblioteket har ein freista å marknadsføre gamle bøker (klassikarar) for å få merksemd og utlån på eldre materiale. Lokala er veleigna og ligg sentralt til, slik at det er enkelt for folk å ”droppe inn” når dei elles er på handletur. Dei tilsette ved folkebiblioteket har sporadisk drive med leksehjelp for skuleelevar når desse har bede om hjelp.

Sommaropninga fall i god jord både blant turistar og fastbuande. Biblioteket var særs godt besøkt i dei timane midt på dagen då biblioteket var ope i juli, og det kom mange positive tilbakemeldingar på dette. Turistar har særleg sett pris på å kunna ha ein stad der dei kan bruke nettbank og sjekke e-post.

Elles er det oppretta eigen tilhengarside på facebook der informasjon blir jamnleg oppdatert, og denne hadde ved årsskiftet 114 tilhengarar. På denne sida kan brukarar og andre interesserte også kommunisere med biblioteket. Nyhende om arrangement m.m. vert også lagt ut på bibliotekbloggen som er lenka til biblioteket si heimeside. Informasjon om arrangement har og vore lagt ut på kulturkalenderen på kommunen si heimeside. Dette har vore måten å marknadsføre aktivitetar på når folkebiblioteket ikkje har hatt budsjett til å annonsere desse i lokalavisa. Elles har ein hengt opp plakatar med informasjon på butikkar rundt om i kommunen.

Mange av bibliotekbrukarane har komme og gjeve bøker og filmar til folkebiblioteket sitt, og slik vist at folkebiblioteket er ei teneste som blir høgt verdsett. Av den grunn har biblioteket hatt ein liten tilvekst, sjølv om det er mest eldre bøker og pocketseriar som har vore tilvekstført. Men og nokre nye bøker har brukarane donert til biblioteket.

Alle einingsleiarane vart i samband med budsjettførehavingane bedne om å lage eit såkalt utfordringsnotat, der ein skulle liste opp viktige tiltak for kommande år. Biblioteksjefen foreslo mellom anna å auke mediebudsjettet til 305.000 kroner, noko som er eit rimeleg beløp om ein samanliknar med kva andre kommunar brukar på mediekjøp. Frå etaten vart det foreslått 12.300 kroner i samla mediebudsjett. Dette vart plussa på med 50.000 kroner i den endelege budsjetthandsaminga, slik at ein samla fekk 62.300 kroner til rådvelde til innkjøp av medier i 2010.

Folkebiblioteket har eit mindreforbruk på budsjettet for 2009. Dette er mest tydeleg på løn, og dette skuldast i hovudsak lågare pensjonsinnskudd enn budsjettert med, i tillegg til at ein foretok dei innskrenkingane på løn som er nemnt lenger opp. Det er mindre forbruk på innkjøp av media i forhold til budsjettet, avdi ein ikkje fekk høve til å bruke gjenståande midlar. Det er og budsjettert med meir til leige/leasing av kopi/fax-maskin enn det biblioteket har motteke faktura på.

Det er eit mindreforbruk på drift pr. rekneskapsavslutning. Dette skuldast at faktura på straumutgifter enno ikkje er motteken.

Austevoll, 24.02.2010

Laila E.R. Årland

Biblioteksjef

Hjelp oss å strikke bokorm!

2010-02-23T17:00:00.002+01:00

I dag kom ein glad bibliotekbrukar med ei stor korg med fargerikt restegarn og ein påbegynt bokorm og overrekte heile stasen til folkebiblioteket! Vil du vera med og strikke den ferdig? Den kan bli så lang som helst, og så lang som mogleg, for vi vil hengja den opp i barneavdelinga den dagen den er ferdig. Ver med og sett ditt eige personlege preg på Austevoll folkebibliotek sin bokorm! Har du restegarn til overs? Ta det med, kom innom, sett deg ned om du har ei ledig stund, og strikk litt!

Siste del av foredragsrekkje av Olav Drivenes

2010-02-18T12:12:00.002+01:00

Olav Drivenes kjem til folkebiblioteket laurdag den 27. februar kl. 12.00 og vil avrunde foredragsrekkja han byrja på i januar, om kvinner og menn i Drivenes/Bekkjarvik-området. Dette var eit godt besøkt arrangement som skapte ein god respons hjå dei frammøtte tilhøyrarane. Gå difor ikkje glipp av dette siste foredraget der Olav vil avrunde og avslutte forteljingane sine om perioden frå 1920/30 til kring 1970/80. Det er igjen Venner av biblioteket som står som arrangør. Gratis adgang, alle velkomne!

Månadens bilete på folkebiblioteket

2010-02-04T12:23:00.004+01:00

Born frå kulturskulen i Austevoll vil jamnleg stille ut og presentera elevarbeid på folkebiblioteket framover. Dei får fast plass i biblioteket i glas og ramme. Dette arrangementet vil få namnet "Månadens bilete".

Første utstilling og presentasjon vert laurdag den 13. februar kl. 12.00. Motivet er ein collage eller samansetjing av fleire bilete med temaet "Vinterdag i Austevoll 2010". Alle er hjarteleg velkomne til å sjå og høyra på!

Kulturskulen serverer kaffi og kaker.

Boksal på folkebiblioteket

2010-01-27T13:48:00.000+01:00

Vi er i gang med å kassere gamle bøker, og sel dei ut for 5 kroner pr bok. Dette er billeg! Det er mest romanar for vaksne, men og ein del andre bøker. Kom og kjøp!

Nytt år - nye kåsørar!

2010-01-13T16:36:00.000+01:00

Olav Drivenes

Olav Drivenes er fødd i 1928 i Austevoll. Han tok examen artium på Voss i 1948. Han arbeidde nokre år i Postverket, til han reiste og byrja på lærarskulen på Stord der han var ferdig utdanna i 1956. Deretter arbeidde han som lærar i barneskulen i Austevoll og Fitjar i 25 år. Olav var skulesjef i Austevoll i 15 år.

Av interesser/hobbyar kan nemnast spesielt fiskeri. Elles likar han godt friluftsliv, særleg turar i fjellheimen.Han har mange gode minne frå turar i inn- og utland saman med kona.

Olav Drivenes kjem til folkebiblioteket

torsdag den 21. januar kl. 18.00

og laurdag den 23. januar kl. 12.00

med kåseriet:

”Kvinner og menn i Drivenes/Bekkjarvik-området

kring 1920/30 til kring 1970/80”

Arrangør: Venner av biblioteket

Gratis adgang. Alle velkomne!

Opningstider i romjula

2009-12-08T12:34:00.001+01:00

Opningstidene i romjula vert slik:

Onsdag 23. desember (Lille julaften): 9.00 - 12.00
Julaften:                                             Stengt
Måndag 28. desember:                      Stengt
Tysdag 29. desember:                       10.00 - 14.00
Onsdag 30. desember:                      10.00 - 14.00
Nyttårsaften:                                     Stengt

Vi ynskjer alle våre lånarar ei god og fredfull jul.

Populær kåsør

2009-12-03T15:47:00.001+01:00

Kåseriet med Elias Fondenes var så vellukka at han er blitt beden av folk som høyrde på han sist om å komme attende til biblioteket og fortelja meir. Så han stiller opp på ny, og vil då også framføra noko av det han har skrive om i heftet "Vist & Gale".

Heftet kan du låna på folkebiblioteket.

Elias kjem altså til folkebiblioteket tysdag den 15. desember kl. 18.00. Be there!

Arrangør: Venner av biblioteket

Gratis adgang. Alle velkomne.

Jul i gamle dagar

2009-12-03T11:07:00.005+01:00

"Jul i gamle dagar"
- eit kåseri av Olav P. Årland

Olav P. Årland kjem til folkebiblioteket og vil fortelja om korleis han opplevde jula og julefeiringa då han var liten.

Olav P. Årland er fødd i 1932 og oppvaksen i Kvalvågen på Stolmen. Alt som 14-åring reiste han ut på fiske. Han var enno ikkje fylt 16 år første gongen han mønstra på eit skip i utanriksfart, og reiste ute i fleire periodar. Han har elles vore både fiskeskipper og styrmann. I tillegg har han vore tollar, og han har og vore lærar på fiskarfagskulen. Han har vore kommunepolitikar, og i ein periode var han og ordførar i kommunen. I tillegg har han hatt fleire verv både kommunalt og interkommunalt.

Olav er framleis aktiv i fleire verv. Elles er han mykje ute på sjøen og fiskar og sett ut krabbeteiner på hobbybasis.

Tidspunkt og stad: Austevoll folkebibliotek torsdag den 17. desember kl. 18.00.

Arrangør: Venner av biblioteket.

Gratis adgang. Alle velkomne.

Eventyrstund på folkebiblioteket

2009-11-13T17:27:00.004+01:00

Det blir eventyrstund for barn
laurdag den 12. desember og laurdag den 19. desember kl. 12.00.

Heidi Sekkingstad vil lesa og fortelja eventyr for dei minste i førjulstida. Gratis for alle. Velkomne alle barn!
Arrangør: Venner av biblioteket.

Heidi Sekkingstad kjem til biblioteket og fortel eventyr!

Ragnhild. Ei allsidig kvinne.

2009-11-13T17:26:00.009+01:00

"Tankeblikk"
-eit kåseri av Ragnhild Veivåg.

Torsdag den 19. november kl. 18.00.

Venner av biblioteket er glad for å kunne by på kåseri med kjende personar i lokalsamfunnet. Arenaen for kåseria er sjølvsagt folkebiblioteket, og det ser ut til at dette fengar eit breidt publikum.

Ragnhild Veivåg vil kåsera på folkebiblioteket.

Ragnhild Veivåg er fødd i Austevoll i 1921. I 1926 flytta ho med familien til Tysnes. Under krigen vart ho invitert av ei venninne til å vera med på hysefiske i Austevoll, og der fekk ho napp på både fisk og mann. Ho flytta difor attende til Austevoll og gifta seg og busette seg på Rabben i 1946.

Ragnhild har vore formann i husmorlaget som ho var med å starte opp, og har elles vore aktiv i styre og stell. Ho har og skrive ei lita bok med ulike erindringar, og vil bruke litt av dette når ho kjem på vitjing til folkebiblioteket.

Gratis adgang. Alle velkomne.

Arrangør: Venner av biblioteket.

Elias. Ein kjend og kjær lokal profil.

2009-11-04T11:10:00.003+01:00

Arrangement på folkebiblioteket torsdag den 12. november kl. 18.00:

"Heimafiske langs med landet"
-eit kåseri av Elias Fondenes.

Arrangør: Venner av Biblioteket. Gratis adgang. Alle velkomne.

Elias Fondenes om seg sjølv:

"Eg er fødd i 1927, oppvaksen i Kolbeinsvik og har bodd der mesteparten av mitt liv. Då eg vart vaksen vart det for min del, som for så mange andre, å reisa på fiske. Min første tur var vinteren 1942. Seinare vart det å halde fram med fiske og fraktefart heilt til eg måtte gå på land av ulike årsaker. Det var mykje reising i samband med fiskeri og fraktfarten. Eg var mellom anna med og førte ferdighus frå Austlandet til Finnmark, som då var nedbrent av tyskarane. Seinare vart eg innkalt til militærtenesta. Då kom eg til Tyskland og avtente verneplikta mi der.

Det var vanskeleg å få fast arbeid etter at eg gjekk i land, så det var berre å ta det som baud seg. Det var målararbeid både inne og ute. Eg var litt borti steinarbeid, isolering av hus og eg murte også ein del skorsteinar samt utførte ulikt vedlikehaldsarbeid. Eg byrja som feiar og dreiv med det i nokre år, fram til eg vart tilsett som vaktmeister på dei kommunale bygg på Storebø.

Av hobbyar har eg hatt forskjellige ting, slik som småfiske og trearbeid, eldre historie og "kjøkenskrivar" som vart til eit lite hefte: "Vist & Gale" (2002), samt skrive litt i Marsteinen (lokalavisa i Austevoll) og Kyrkjebladet."

Elias er ein mann med lun humor. Smilet ligg alltid på lur. Samstundes er han og ein som tek humor på alvor. Det kjem tydeleg fram i dei epistlane som med ujamne mellomrom framleis dukkar opp i Marsteinen. Han er flink til å bruke sin eigen form for humor til å få fram alvorlege poeng i ting som opptek han og mange andre i kvardagen. Det kan handle om smått og stort både på riksplan og lokalplan.

Her er ein sliten smakebit frå heftet "Vist & Gale":

Helsevesen

Det e eit marakel i denna vera

desse politikarane vil ingjen ting jera,

dei kan ikkje laga ei einaste krona

og longt ifrå milijona.

Og me so følte oss so trygg

no ligg Helsevesene i grøfta med brekka rygg,

og me so dåke våre stemme gav

no e me komen til køys med stav.

Me so trudde alt ka de sa

de verka både trygg og gla,

men neste gong ska me ikkje stemma på dåke

då ska me sitja heima og seia att me e låke.

Detta va ein peikepidn til dåke so styre

og te dei som sete bakom å fyre.

Heftet "Vist & Gale" kan du låna på folkebiblioteket!

Eventyrstund!

2009-10-26T12:52:00.005+01:00

Velkomen til eventyrstund på Austevoll folkebibliotek
torsdag 5. november kl. 17.30.

Liv Brita Brodal fortel «Bymusikantane i Bremen»

Bli med eit esel, ein hund, en katt og ein hane på rømmen! Dei flyktar frå dei forferdelege eigarane sine og skal til Bremen for å bli bymusikantar. Men på vegen må dei gjennom ein skog full av røvarar- røvarar med masse musklar og digre sablar!

Eit av brødrene Grimm sine finaste eventyr blir levande gjennom leik, røyrsler og musikk som barna er med på å lage. Forestillinga varar omlag 40 minutt og passar best frå 4 år og oppover. Arrangementet er gratis, og finn stad på Austevoll folkebibliotek i Bekkjarvik.

Om forteljaren:

Liv Brita Brodal har bachelor i drama og teater med fordjuping i forteljarkunst. Ho arrangerer kvar veke forteljarforestillingar for barn i Stavanger, samt månedlige forestillingar for vaksne. Ho har fortalt for både barn og vaksne på festivalar over heile Noreg, samt i Sverige, Danmark og Canada. Ho har slekt og røter på Storebø.

Arrangør: Austevoll kommune,

Den kulturelle skulesekken.

Halloween!

2009-10-19T13:07:00.001+02:00

Halloween er det engelske navnet på Allehelgensaften, det vil si natta før Allehelgensdag, den katolske minnefesten for helgener og martyrer, og feiringa av denne kvelden. Ifølge engelsk tradisjon feires Halloween om kvelden den 31. oktober, dagen før 1. november, mens Allehelgensdagen eller "helgemess" i Norge er lagt til første søndag i november. (Wikipedia)

Det er vel først og fremst ungane som feirer denne dagen, og mange kler seg ut og går rundt på dørene og samlar inn godteri. For å unngå skumle knep og triks er det best å vera førebudd og ha handla inn godteri til eventuell vitjing av både spøkelsar og troll denne kvelden!

På biblioteket kan du låne bøker om Halloween og bøker om korleis du kan kle deg ut. Og nokre skumle bøker også! :)

Hausten er her

2009-10-05T19:41:00.000+02:00

Tida går, seier vi. Og meiner med det alt som har hendt, og alt som skal koma. På folkebiblioteka har bokhausten starta, men diverre blir det ikkje så mykje nytt i hyllene denne hausten heller. Kommunen sin innkjøpsstogg varer stadig, og dette er leit når ein tenkjer på at det ikkje er mykje som skal til når det gjeld å skape rom for lesing og opplevingar. Dei einaste nye bøkene på biblioteket i haust er det lånarane som har kjøpt og donert, etter å ha lest dei først sjølve.

Ein får freiste å gle seg over tilværet likevel, og finna trøst i dei fine og fargesprakande dagane innimellom. I dag er ein slik fin dag.

Biblioteket sine gode vener!

2009-09-25T21:44:00.001+02:00

Folkebiblioteket har mange gode støttespelarar. Ein god del av desse kjem med bokgåver. Og bibliotekaren blir like hoppande glad kvar gong det skjer. Slike gåver er svært kjærkomne når det ikkje finst midlar til innkjøp. I dag fekk vi ei ekstra stor gåve, heile 12 kassar med bøker og filmar! Mykje av dette kunne biblioteket nyttiggjere seg.

Eit lite utval av gåva som biblioteket fekk i dag.

Dette betyr mykje arbeid for bibliotekaren med registrering, plasting og merking av alt materialet, men det er svært kjærkome arbeid. Det blir teke unna etter kvart, og bibliotekaren tek fatt på arbeidet med godt humør! Så får ein heller leve ei stund med at det blir trongt og fullt i skranken, sidan bibliotekaren heller ikkje har noko eige kontor å setje kassane inn på.

Slik ser det ut på "kontoret" i skranken nett no.

Folkebiblioteket er svært takksam for slike gode gjevarar, og alt monar! Denne gongen kom gåva frå ein mann som jamnleg er innom og tek seg ein kopp kaffi og les aviser og tidsskrifter. Då han skulle flytte til ny bustad kom han til folkebiblioteket med materialet i staden for å kaste det. Dette set vi umåteleg stor pris på!

På vegne av folkebiblioteket sine brukarar: Tusen takk, Inge Hustad!

Venner av biblioteket - møteinnkalling!

2009-09-16T22:03:00.000+02:00

Samanslutninga "Venner av biblioteket" er ei interessegruppe som er skipa fordi brukarane av biblioteket gjerne vil vera med på å initiera og gjennomføra aktiviteter i folkebiblioteket. No har også ordføraren sagt at han gjerne vil koma til biblioteket og ha eit møte (idé-myldring) saman med andre som og er interesserte. Møtet blir måndag den 21. september kl. 17.00 på folkebiblioteket. Det blir også kaffi og litt attåt. Møteinnkallinga er vedlagt her, klikk på biletet for å få det større!

Knut Hamsun 150 år

2009-09-13T10:34:00.003+02:00

Bibliotekaren let seg stadig inspirere av andre når det gjeld tilbod og tiltak, og denne veka var det 3 vise kvinner i Lom som inspirerte med sitt blogginnlegg om Knut Hamsun. Lom er jo, som kjent, fødestaden til Hamsun. Dermed tok bibliotekaren turen ned trappa til sydama som og held til her på Torget, og fekk tak i eit ganske stort svart bomullstystykke. Dette vart til "duk" på eit bord som kan brukast til diverse utstillingar. Etter litt hjelp frå den alltid hjelpsame og blide vaktmesteren med å få bordet ut frå kottet der det sto (det var ikkje lett, og vi heldt på og manøvrerte hit og dit ei stund) vart det å prøve seg fram med plassering av utstillinga. Til slutt havna den rett ved sida av døra, der folk ser den med ein gong dei kjem inn i biblioteket. Allereie har det vore gode tilbakemeldingar på ei slik utstilling, både på facebook og frå folk som kjem innom.

Kaffikos på folkebiblioteket

2009-09-03T15:31:00.004+02:00

No kan biblioteket by på nytrekt kaffi til dei som kjem innom. Det kostar kr. 10.- pr kopp. Velkomen til ei hyggjeleg føremiddags- eller kveldsstund med kaffi og tidsskrifter eller prat rundt bordet!

Felles nasjonalt lånekort

2009-08-21T08:45:00.003+02:00

Austevoll folkebibliotek er no med på ordninga med Felles nasjonalt lånekort. Dette er eit nasjonalt samarbeid som gjer at lånaren kan nytte det same kortet til utlån i mange ulike bibliotek. Har du eit slikt kort frå før kan du no bruke det til å låna materiale også her. Førebels har biblioteket ikkje eigne nasjonale lånekort til utferding. Les meir om nasjonalt lånekort, til dømes her: www.lanekortet.no

Om du ynskjer å kontrollere kva opplysningar som er lagra om deg til ei kvar tid kan du gjere det her: https://fl.lanekortet.no/laanekort/innsyn.php

Austevoll folkebibliotek på facebook

2009-08-12T08:46:00.005+02:00

Det er no oppretta ei eigen side for Austevoll folkebibliotek på facebook. Det er etter kvart mange folkebibliotek på facebook, og det er ein fin måte å nå ut med informasjon på til dei som melder seg som tilhengarar av biblioteket. Samstundes vonar ein at dette kan fungere som eit forum for meiningsutveksling for biblioteket sine brukarar.

Stortingsvalet 2009 - Førehandsrøysting

2009-08-11T14:13:00.001+02:00

Det er lagt opp til førehandsrøysting på folkebiblioteket følgjande dagar:

Laurdag den 5. september 2009 kl. 1100-1300.

Fredag den 11. september 2009 kl. 1600-1900.

Har du lyst til å arbeide i bibliotek?

2009-08-06T11:26:00.003+02:00

Austevoll folkebibliotek treng ein medarbeidar SNARAST på dag og kveldstid, 2 dagar i veka. Arbeidet består hovudsakleg i utlån og innlevering av materiale, rydding og vanleg kundebehandling. Det er viktig at du er van med å bruke data og internett, har fin og høvisk framferd og vanleg god almenfagleg utdanning.

Opplæring må påreknast.

Ta kontakt med folkebiblioteket på tlf. 55081272, eller kom innom. :)

Sommaropningstider 2009

2009-06-29T14:24:00.004+02:00

Denne sommarferien vil biblioteket halde ope fleire vekedagar i tillegg til laurdagane. Slik ser opningstidene ut:

Opningstider frå 6. juli til 1. august:

Tysdag: Kl. 11.00 – 14.00
Onsdag: Kl. 11.00 – 14.00
Torsdag: Kl. 11.00 – 14.00
Laurdag: Kl. 11.00 – 13.00

Ordinære opningstider vil igjen gjelda frå og med veke 32.

Me på biblioteket vil ynskje alle våre lånarar ein riktig god sommar!

Bokgåve

2009-06-24T14:19:00.003+02:00

Biblioteket har utan vederlag fått overta meir enn 100 bøker etter Oddmund Søreide sitt dødsbo. Det er hovudsakleg bøker om sjøfart og fiske, polarlitteratur og bøker av lokalhistorisk interesse. Også bokverket "Norske Gaardnavne" av Oluf Rygh har biblioteket fått. Biblioteket vil hermed takka Knut Ove Søreide så mykje for gåva.

Kongebesøket

2009-06-15T10:15:00.004+02:00

I samband med at biblioteket skal brukast som hovudkvarter av politi og sikkerhetsvakter ved kongebesøket må biblioteket diverre halde stengt den 16. juni.

Nye opningstider!

2009-04-22T14:40:00.004+02:00

No er det nye opningstider ved folkebiblioteket. Dei tek til å gjelde umiddelbart! Dei nye opningstidene er:

Måndag: Stengt
Tysdag: Kl. 09.00 -19.00
Onsdag: Kl. 09.00 - 15.00
Torsdag: Kl. 09.00 - 19.00
Fredag: Kl. 09.00 - 15.00

Laurdag: Kl. 11.00 - 13.00

Vi ynskjer alle gamle og nye lånarar vel møtt til biblioteket!

Verdens Bokdag!

2009-04-17T10:51:00.003+02:00

I høve "Verdens Bokdag" på torsdag den 23. april vil det bli eventyrstund for barn kl. 17.00 på folkebiblioteket. Barn i alle aldrar vel møtt!

Sivle-foredraget 4. april

2009-04-04T16:04:00.005+02:00

Kulturarrangementet med forteljing frå Per Sivle sitt liv med tilhøyrande opplesing vart ein suksess. Trass i det fine vårveret ute møtte det opp ca. 45 tilhøyrarar, og dei både lo og gret ein skvett under det 1,5 timar lange foredraget. Jens Brekke er ein utmerka foredragshaldar, og kan anbefalast til andre som er interesserte i Per Sivle som tema. Alle fekk plass fordi vi kjørte bort hyller og tok klappstolar inn i biblioteket. Det vart stor applaus, så Brekke måtte trø til med eit "ekstra-nummer" til slutt.

Kulturarrangement på biblioteket

2009-04-02T10:45:00.006+02:00

Førstkomande laurdag den 4. april kjem Jens Brekke til biblioteket i Bekkjarvik for å framføra dikt av Per Sivle. Vi ynskjer alle velkomne til biblioteket denne dagen. Opningstid er frå kl. 10.00 til kl. 15.00. Opplesinga byrjar kl. 12.30.

Ting byrjar å falle på plass

2009-03-28T08:32:00.011+01:00

Endeleg ser det ut til at den største flyttesjauen er over, og biblioteket byrjar å ta form. Publikumsmaskinene er på plass, og det er laga sitjegrupper både i tidsskriftavdeling og i ungdomsavdeling. Det har vorte lysare avdi vi har fått reolane bort frå vindaugene slik at dagslyset strøymer inn. Bibliotekaren har fått ein brukbar arbeidsplass som er litt meir skjerma frå publikum enn den var frå før. Det var ikkje plass til noko kontor, så det var i alle fall den beste løysinga vi kunne få til. Nokre stader er det vel mørkt enno. I ungdomsavdelinga er det ikkje vindauge, så der må det meir lys til for å kunne lesa kva som står på bokryggane. Men det kjem. Barneavdelinga er blitt lys og luftig. Så no håper vi at lånarar og andre vil trivast i lokalet. Vi har hatt god hjelp frå Siri Sjursen ved Hordaland fylkesbibliotek med innreidinga av biblioteket.

Inntil vidare er biblioteket ope kun på laurdagar kl. 10.00 - 15.00 fram til det er avklart kva ressursar biblioteket rår over. Innkjøpsstoppen gjeld difor diverre også framleis, så det vil ikkje bli kjøpt inn nye bøker eller andre media før budsjettsituasjonen for biblioteket har betra seg.

Flyttesjau

2009-02-20T16:31:00.005+01:00

Ombygging og flytting er i full gang på folkebiblioteket. Foreløpig ser det ut som eit einaste stort kaos, men det går faktisk framover. Det er ein stor jobb som skal gjerast, og det er mange involvert. Vi freistar å halda ope kvar laurdag allikevel, sjølv om folk må smyga seg langs reolar og kasser. Nokon dato for gjenopning på kvardagar kan ein ikkje seie noko konkret om enno. Lånarar og andre interesserte kan følgje med på bloggen her, og sjølvsagt i lokalavisa Marsteinen. Gjenopning vil verta behørig gjort kjent. Nokre bilete for å illustrere arbeidstilhøva for tida legg vi ut her.

Vinnarar av bokpremiar

2009-01-14T13:19:00.006+01:00

Bibliotekarane har i dag føreteke den høgtidelege trekninga av to bokpremiar. Vinnarane vart trekte ut blant dei som kom og lånte bøker ved Austevoll ungdomsskule tysdag den 13. januar. Og vinnarane vart:

Mona Solbakken og Edith Drønen.

Dei vil få i gåve boka "Piken fra prærien" av Ragnhild Tangen.

Vi gratulerer!

Opningstider i flytteperioden

2009-01-13T11:14:00.001+01:00

Biblioteket i Bekkjarvik vil i ein flytte- og ombyggingsperiode ha redusert service og opningstider for publikum. Frå og med veke 4 vil opningstidene vera kvar laurdag, frå kl. 10.00 – 15.00. Gjenopning med ordinær opning på kvardagar vil bli annonsert. Vi ber om forståing for dette, og vil koma attende med eit mykje betre tilbod i nær framtid.

Årsmelding 2008

2009-01-12T12:06:00.001+01:00

Austevoll folkebibliotek

Årsmelding 2008

Året 2008 har vore eit hendingsrikt år på fleire måtar. I april vart det vedteke i kommunestyret å innføre purregebyr på for seint innlevert materiale. Biblioteket hadde frå før berre overdagspengar på video. På den måten vonar ein å få større sirkulasjon i samlinga, og å sleppe å sende påminningar fleire gonger utan å få respons. Nokon stor økonomisk vinst får ein ikkje av det, men det hjelper til ved at ein sparer litt inn på administrasjon, rutiner og porto.

Omtrent samstundes fekk biblioteket i gang ein bibliotekblogg, som personalet bruker for å nå ut med informasjon til lånarar og andre kontaktar. Biblioteksjefen og bibliotekmedarbeidaren deltok våren 2008 på eit minikurs med tre samlingar på Stord for å få dette til. Bloggen har blitt eit viktig supplement til den offisielle heimesida, og dei er linka til kvarandre.

Frå 30. juli vart Hundvåkøy filial ved Trolandshammer skule lagt ned som følgje av tidlegare vedtak i kommunestyret. Denne eininga fungerte som kombinasjonsbibliotek i virkekretsen. Vi takkar Margit Eidsheim, som i ti år styrte filialen.

Frå byrjinga av juni vart det innført innkjøpsstopp som direkte følgje av overforbruk ved flyttinga av biblioteket i Bekkjarvik i november 2007. Dette førte til at ein ikkje kunne bestille eller kjøpe inn nokon fleire bøker eller anna materiale i det heile tatt til nokon av einingane etter denne tid. Difor har ikkje biblioteket kunna tilby lånarane noko av det nye dei etterspør, og portoutgifter til fjernlån auka difor mykje i fjor. Budsjettet har etter denne tid kun vore brukt til abonnement, drift og lønsutgifter. Biblioteka har etter vedtak i kommunestyret vore likestilt økonomisk i 2008.

Fylkesbiblioteket slutta i fjor med å tilby fjernlån av spelefilmar på DVD. Dette avdi dei ikkje sjølv fekk høve til å tilby desse til sine eigne lånarar på grunn av den store etterspurnaden på dette materialet. Difor har ikkje folkebiblioteket kunna yte denne servicen lenger heller.
Frå 1. september vart einingane ved Austevoll ungdomsskule og eininga i Bekkjarvik Torg likestilte også når det gjaldt opningstider for publikum, med 13 timar for kvar eining med personalressursen på 1,4 % fordelt på 2 stillingsinnehavarar pluss laurdagsvikarar. Frå denne datoen vart det laurdagsope kun i Bekkjarvik på grunn av at det kom ikkje lånarar til ungdomsskulen på laurdagar. Biblioteket ved ungdomsskulen har opplevd ein nedgang i utlånet, medan biblioteket i Bekkjarvik har hatt ein tilsvarande oppgang.

I desember 2008 vart det i kommunestyret vedteke å leggja ned eininga ved Austevoll ungdomsskule for å samlokalisere bibliotektenestene i Bekkjarvik Torg på Selbjørn. Etter innskrenkingar og lave budsjett over fleire år innsåg ein at det ikkje var mogleg å drive to likestilte bibliotek i kommunen med dei ressursane ein rår over. Dette har skapt stor debatt blant brukarane av biblioteket, med underskriftskampanjer og lesarinnlegg i lokalmedia. Vedtaket vil verta effektuert i januar 2009.

Austevoll, 12.01.2009
Laila E.R. Årland
Biblioteksjef

Stenging av biblioteket ved Eidsbøen ungdomsskule

2009-01-07T11:24:00.006+01:00

Biblioteket ved Eidsbøen ungdomsskule vart i kommunestyret i desember vedteke flytta til Bekkjarvik Torg på Selbjørn. Her skal folkebiblioteket samlokaliserast i ei eining. Dette vedtaket vert sett i verk frå og med veke 3. Det betyr at frå og med måndag 12. januar er biblioteket ved ungdomsskulen nedlagt. Imidlertid vil vi gje publikum høve til ein ekstra opningskveld TYSDAG 13. JANUAR kl. 16.00 - 19.00. Då vil vi gje ekstra lang lånetid på alle bøker som blir utlånt, opptil 3 månader. I tillegg har vi amnesti-dag for purregebyr, det vil seie at alle som kjem med materiale som dei tidlegare har fått purring på, får sletta kravet om gebyr. Vi vil også trekke ut eit par av dei som kjem og låner noko denne dagen, som vil få ein bokpremie.

Opningstider i romjula

2008-12-16T13:29:00.002+01:00

Opningstidene i romjula vert som følgjer:

Avd. Storebø: Laurdag 27. desember kl. 12.00 – 14.00
Siste opningsdag før jul: Torsdag 18. desember kl. 10.00 -14.00

Avd. Selbjørn: Laurdag 27. desember kl. 11.00 – 13.00
Siste opningsdag før jul: Måndag 22. desember kl. 11.00 – 15.00

Vi ønskjer alle våre lånarar ei riktig god jul.

Prosjekt Leselyst er opphørt

2008-11-26T15:27:00.003+01:00

Grunnskulane i Austevoll er med tida blitt vel kjende med Prosjekt Leselyst, eit opplegg for 4. - 7. klasse som alle skulane kvart år kunne melde seg på og få låne bokkasser frå biblioteket. No har produsenten avslutta dette prosjektet, så det vil ikkje bli fornya meir. Folkebiblioteket vil tilby skulane det same opplegget som vi har no til det er "oppbrukt". Det vil seie at om det blir for mykje manko ved tilbakelevering frå skulane, så vil det ikkje vera mogleg å skaffe nytt. Difor vil dette tilbodet etter kvart diverre forsvinne.

2008-09-03T12:55:00.004+02:00

Begge bibliotekavdelingene har no fått inn boka "Bisettelsen " av Lars Saabye Christensen.

"Det har gått mange år siden ungdomsopprøret til kompisene Kim, Sebastian, Ola og Gunnar. Den gang handlet det om troen på fremtiden, om forelskelser, om nedturer og om forholdet til Beatles. Nå er de godt voksne, og samlet igjen. Oppfølgeren til Bly (1990) og Beatles (1984) er full av mystikk og musikk, og vi får endelig vite hvor det er blitt av gutta."

«Planen var at jeg skulle besøke åstedet ved Dakotabygningen, der Lennon ble skutt, der brillene falt, og jeg tenkte liksom at jeg kunne legge fire blomster der, fra oss, fra The Snafus, for vi er fire fremdeles, ikke sant, ville ikke det vært riktig, det var liksom mitt oppdrag.»

Nye opningstider

2008-08-21T12:25:00.003+02:00

Frå 1. september får folkebiblioteket nye opningstider. Desse blir som følgjer:

Avd. Storebø (Eidsbøen):

Tysdag kl. 9.00 – 11.00 og kl. 16.00 – 19.00
Onsdag kl. 10.00 – 14.00
Torsdag kl. 10.00 – 14.00

Avd. Selbjørn (Bekkjarvik):

Måndag kl. 11.00 – 15.00
Onsdag kl. 11.00 – 15.00
Torsdag kl. 16.00 – 19.00
Laurdag kl. 11.00 – 13.00

Som ein ser er det då likt antal opningstimar ved einingane, og kveldsope ein dag i veka begge stader. Med dette prøver ein å imøtekomme publikum sine ønskje om kveldsopne bibliotek. Det er ikkje lenger ope på laurdagar på Eidsbøen fordi det viste seg at det ikkje kom folk dit den dagen.

Innkjøpsstopp

2008-06-06T12:34:00.004+02:00

På grunn av overskridingar på bibliotekbudsjettet i fjor har biblioteket vorte pålagt innkjøpsstopp frå dags dato og inntil vidare. Overskridinga skal takast att på inneverande års budsjett og eventuelt også neste år. Difor vert bokønske frå publikum berre notert, og ikkje effektuert, inntil ein eventuelt får ny melding om at innkjøpsstoppen er oppheva.

Nedlegging av biblioteket på Hundvåkøy

2008-06-05T11:23:00.006+02:00

Frå 30. juni vert bibliotekeininga ved Trolandshammer skule på Hundvåkøy stengt som følgje av tidlegare vedtak i kommunestyret. Vedtaket skulle vore effektuert i fjor, men no blir det sett i verk. Denne eininga har fungert som kombinasjonsbibliotek i kretsen. Nedlegginga blir kunngjort her på biblioteket sin blogg og heimeside og i lokalavisa Marsteinen. Bøker og anna materiale tilhøyrande biblioteket skal i ein periode framleis kunne leverast i bokkassen ved inngangsdøra til biblioteket. Vi vil her nytta høvet til å takke Margit Eidsheim, som har gjort ein strålande innsats som filialstyrar på Hundvåkøy dei siste ti åra.

Tidsskrift-gåve!

2008-05-23T10:40:00.007+02:00

Padleklubben "Havstril" har igjen sett seg råd til å tilgodesjå biblioteket med ei gåve. Eit abonnement på magasinet Padling er gjeve til biblioteket på Eidsbøen. Frå før har biblioteket her fått både 3 videoar og ei bok om havpadling frå padleklubben. Magasinet er bestilt, og vil snart dukke opp på hylla! Biblioteket takkar så mykje for gåva.

Piken fra prærien

2008-04-18T11:48:00.002+02:00

Ragnhild Tangen si bok om Laila Drønen Njåstad er tilgjengeleg på biblioteket. Undertittelen på boka er "Minner fra Amerika".

Frå "vaskesetelen":

"...er et barns bidrag til historien om utvandringen fra Norge til Amerika på 1800 og 1900-tallet. I boka møter du Laila Drønen Njåstad. Hun er født i Canada i 1920 av norske emigranter fra Austevoll i Hordaland og Mo i Telemark.

Laila tar oss med til prærien i Canada og forteller om livet der på 1920-tallet. Sju år gammel opplever hun at familien blir hardt rammet av sykdom og død.

Laila skildrer rike barneår med familien i Canada etterfulgt av ensomme dager som fosterbarn i Norge. Til tross for stadig nye utfordringer, klarer hun å gripe det gode og lyse ved livet. Troen, håpet, og drømmen bærer henne.

De gamle bildene i boka gir innsyn i utvandrernes liv i Amerika og glimt fra hverdager i Austevoll fra 1930 og fram til i dag."

Om forfattaren:

"Boken er ført i pennen av Ragnhild Tangen. Hun er utdannet cand.mag. og er frilansjournalist. Hun har arbeidet som lærer og bibliotekar og vært knyttet til Kystradioen i Bergen i over 20 år."

Tidligere bøker:

"Bjørnar" 1981

"Levende lån" 1998

"Gudrun frå Liaskjæret" 2005

Årsmelding 2007

2008-04-18T10:47:00.002+02:00

Austevoll folkebibliotek

Årsmelding for 2007

Opningstider for publikum ved dei 3 bibliotekeiningane i dag:
Storebø:
9 timar på dagtid, 8 timar på kveldstid, 2 timar kvar første laurdag i månaden.
Totalt: Ca. 17,5 t/v.

Selbjørn:
8 timar på dagtid, 2 timar kvar laurdag.
Totalt: 10 t/v.

Hundvåkøy:
3 timar på dagtid, 2 timar på kveld.
Totalt: 5 t/v.

Opningstimar totalt alle einingane: Ca. 32,5 t/v.
Tal på tilsette: 3 + 3 laurdagsvikarar.

Personalressursar totalt ved alle einingane: 1,6 årsverk + laurdagsvikarar.

Litt nær historie:
Det har vore nokre år med store endringar i bibliotekdrifta. I desember 2005 vart folkebibliotekeininga på Storebø flytta frå Sentrumsbygg til den gamle gymsalen ved Eidsbøen ungdomsskule for å spare pengar på husleige. Det var då stengt i vel to månader for å klargjere lokalet for bruk. Seinare har det og vore ein lengre periode med stengt på grunn av bygging av ein hems i det same lokalet, der Vaksenopplæringa no held til. Opningstidene vart frå hausten 2006 endra, noko som førte til kveldsopning på tysdagar ved denne eininga. Frå februar 2007 vart det i tillegg innført kveldsope på torsdagar. Dette var for at det ikkje skulle fungere som eit reint skulebibliotek, men vera eit tilbod til alle på kveldstid. Etter flyttinga har utlånet gått mykje ned ved denne eininga. No er denne eininga avhengig av at det må vera ope og aktivitet i Austevollhallen og symjehallen for å få besøk på kveldstid. I skuleferiane (haust, vinter) og på laurdagar har det vore slett besøk. Grunnen til det er framfor alt sjølvsagt den ugunstige plasseringa og dei dårlege kommunikasjonane.

I november 2007 fekk eininga på Selbjørn nye lokale i Bekkjarvik Torg. Lokala vart pussa opp for eigaren si rekning, og framleis er det gratis husleige. Lokala vart større og meir tilgjengelege og attraktive. Så langt har besøk og utlån her teke seg opp, slik at eininga ved Selbjørn og Eidsbøen (tal frå 1. kvartal 2008) no har tilnærma like stort utlån trass i skilnaden i opningstider, kvaliteten og innhaldet i tilbodet. Her har biblioteket vore så heldig at ein kan få disponere ei bra samling bøker som Fiskerisogelaget eig, og det har vore brukt, og vil bli brukt, ein del tid på å registrere og tilgjengeleggjere denne samlinga, som blir lagt på delbase i biblioteket sin elektroniske katalog.

Aktiviteten ved eininga på Hundvåkøy barneskule har vore særs lav sett i forhold til dei to andre einingane, på grunn av dei svært begrensa personalressursane og ditto opningstidene. Det har før vore vedteke at denne eininga skulle leggast ned for å spare pengar når brua sto ferdig. Framleis ventar ein på det formelle vedtaket i kommunestyret om nedlegging. Den tilsette der går i 20% stilling, og vil gå av med pensjon ved fylte 70 år i januar 2009. Ein har diverre fått signal om at denne personalressursen då vil verta inndregen for å spare ytterlegare pengar på kulturbudsjettet.

På grunn av ferieavvikling har einingane alltid vore stengt i fellesferien, men eininga ved Selbjørn har kunna hatt laurdagsope i juli.

Elles seier utlånsstatistikken noko om bruken av mediesamlingane, og det viser seg at det er utlånet av andre media enn bøker som samla sett tek seg mest opp; det vil seie filmar, lydbøker og musikk. Denne trenden er landsomfattande, og det blir peika på at folkebiblioteket må ta inn over seg at det eksisterer i ein marknad der det er etterspørselen som i stor grad formar tilbodet. Hittil har ikkje Austevoll folkebibliotek hatt noko réelt mediebudsjett til å kunne etterkoma etterspurnaden. Samla mediebudsjett vart dessutan halvert for få år sidan. Før har det vore mogleg å låne filmar frå Bergen Offentlege Bibliotek, men det er det no slutt på, og grunnen til det er at dei ikkje får nytta filmane sjølv.

Musikk kan ein heller ikkje rekne med å få fjernlåne frå Bergen, så dette er eit tilbod Austevoll folkebibliotek ikkje kan gje i noko fall. Musikk er jo elles ein sjølvsagt del av alle folkebiblioteksamlingar, og det er særs uheldig at ein på grunn av dårleg økonomi ikkje kan koma kundane i møte her.

På grunn av oppgradering og innkjøp av media og utstyr til eininga på Selbjørn fekk ein i 2007 eit overforbruk på budsjettet på meir enn 200.000 kroner.

For å spare pengar har biblioteket frå februar 2008 sagt opp abonnementet på vaksenbøker frå Norsk kulturråd, og vil heller legge meir arbeid i utvelging av titlar til biblioteket. Markedsføring av dårleg salgbar litteratur har ikkje noko for seg, og dei aller fleste av desse titlane samlar støv i hyllene i nokre år før dei kan kasserast.

Biblioteket ved Eidsbøen har hatt 5 brukarorienteringar for dei nye elevane på 8. klassetrinn ved Eidsbøen ungdomsskule, og vonar å få dette inn som ei fast ordning for alle nye klassar kvar haust ved skulestart.

Biblioteket i Bekkjarvik hadde stor opningsdag i det nye lokalet i november med kaker og kaffi spandert av lokalt næringsliv, og det var taler og underhaldning. Elles har det ikkje vore korkje tid eller andre ressursar til organiserte arrangement ved nokon av einingane.

Austevoll folkebibliotek vil likevel freiste å dra nye brukargrupper inn i biblioteket, og vil prøve å få til samarbeid med lokale krefter så som eldrelag, private næringsdrivande, fiskerisogelaget, skulane m.m. Det er likevel begrensa kva ein kan få til med dei personalressursane ein rår over i dag og i ei endå uviss framtid.

Ein vonar og at det skal verta mogleg å få til skilting ved vegen på Eidsbøen som fortel at her ligg bibliotek og vaksenopplæring, og ikkje berre idrettshall. Vidare må ein prøve å få til separate inngangsdører frå foajéen for folkebiblioteket og vaksenopplæringa for å unngå interessekonflikter og for å få gode arbeidsvilkår for begge partar. Vidare planlegging av bibliotekdrifta krev at ein del basis føresetnader må vera på plass, og i tillegg at ein kan seia noko meir om framtida når det gjeld bibliotekstruktur, budsjettilhøve og personalressursar enn det ein kan i dag.

Bibliotekeiningane har fått ein del gåver i form av bøker og filmar frå private, og det må ein vera svært takksam for. Det er verdifullt at folk tenkjer på biblioteket sitt, og det hjelper litt på eit hardt pressa mediebudsjett.

Austevoll, 09.04.2008
Laila E.R. Årland
biblioteksjef

Fiskerisogelaget si samling

2008-04-18T10:00:00.004+02:00

Biblioteket har vore så heldig å få disponere og låne ut frå samlinga til Selbjørn Fiskerisogelag som er plassert ved eininga på Selbjørn. Der finst det litt av kvart, både nyare og eldre ting om fangst, fiske og båtar. Andre ting kan ein og finne der, som t.d. bygdebøker frå Os og Tysnes. Ikkje alt er registrert og søkbart enno, men slik gjer du om du vil søke opp Fiskerisogelaget sine bøker: Gå inn på "Søk i katalogen" på heimesida, endre baser frå "Bøker" til "Fiskeri". Søk på ord, tittel eller forfattar som vanleg. Nokre bøker er ikkje til utlån, men dei fleste kan du låna. Spør bibliotekaren om du lurar på noko. Registreringsarbeidet er ikkje ferdig, så ikkje alt er søkbart enno. Ein reknar med å bli ferdig med registreringsarbeidet i år.

Ny bok

2008-04-17T13:55:00.007+02:00

No har vi fått inn Ken Follett si siste bok, "I all evighet", på biblioteket. Boka er ei frittståande oppfølging av "Stormenes tid" som kom i 1990. Handlinga er lagt til same by, Kingsbridge, men to hundre år seinare.
"På Allehelgensdag i året 1327 sniker fire barn seg ut av katedralbyen Kingsbridge. I skogen ser de to menn bli drept.
Som voksne vil livene deres flettes sammen av kjærlighet, ambisjoner, grådighet og hevn. De kommer til å oppleve fremgang og sult, pest og krig. En av guttene reiser over hele verden, men kommer hjem til slutt. Den andre blir en mektig, korrupt adelsmann. En av jentene trosser den sterke, middelalderske kirken. Den andre forfølger en umulig kjærlighet. Og alle lever de i skyggen av de uforklarlige mordene de bevitnet den skjebnesvangre dagen i barndommen."
Boka er på 1100 sider!

Gåve til biblioteket

2008-04-16T11:20:00.002+02:00

Austevoll folkebibliotek, avdeling Eidsbøen, har fått ei gåve frå Havstril padleklubb. Det er 3 DVD'ar og ei bok om havpadling med kajakk.
Titlane er:

DVD'ar: "This is the Sea" I, II og III
Boka: "Sea kayak" av Gordon Brown (engelsk tekst)

Havstril padleklubb håper klubben og kan vere eit tilbod for ungdom som ynskjer ei utfordring.
Filmane og boka er til utlån for biblioteket sine lånarar og vi takkar for gåva.

Tidsskrift til utlån

2008-04-16T09:36:00.006+02:00

På biblioteket kan du lese og låne tidsskrift. I den seinare tid har vi fått ein del nye tidsskrift som følgje av kulturfondtildelingar. På Storebø (Eidsbøen) har vi fått desse:

SYN OG SEGN - tidsskrift for kultur, samfunn og politikk
KhVERK - kunsthåndverk
Z - filmtidsskrift
FETT - lønn og kjønn
KULTMAG - uavhengig tidsskrift for kultursektoren (Kjem)
VINDUET - tidsskrift for litteratur (Kjem)

Andre nye tidsskriftabonnement:

TERRENGSYKKEL - sykkelmagasin
HUND OG FRITID - eit magasin for alle hundeeigarar
PADLING-Norges beste padlemagasin

I tillegg til desse nye har vi frå tidligare:

Allers
Autofil
Bonytt
Båtliv
Dyade
Forbrukerrapporten
Foreldre og barn
Gjør Det Selv
Hagen for alle
I form
Illustrert vitenskap
Kreative kvinner
Nysgjerrigper
Topp
Vagabond

Biblioteket abonnerer sjølvsagt på lokalavisa Marsteinen.

Vi mottek og ein del gratisblad som: Pensjonisten, Revmatikeren, Klima, Refugees , På flukt, Speideren, Hubro, Miljøstrategi, Språknytt, diverse tidsskrift frå Forsvaret og enda fleire.

Ved eininga på Selbjørn har vi følgjande nye tidsskrift:

BOKVENNEN - litterært magasin
MARG - notater fra randsonen. Allmennkulturelt tidsskrift
NYTT NORSK TIDSSKRIFT - humanistisk/samfunnsvitenskapelig tidsskrift
SAMTIDEN - tidsskrift for politikk, litteratur og samfunnsspørsmål
HISTORIE - populærhistorisk magasin
VAGANT - litterært tidsskrift (Kjem)
ARR - idéhistorisk tidsskrift (Kjem)

Frå før har vi desse:

Bonytt
Båtliv
Familien
Forbrukerrapporten
Foreldre & barn
Norsk hagetidend
I form
Illustrert vitenskap
Topp
Vagabond
Vi over 60

Avdeling Selbjørn abonnerer på avisene Fiskaren, Marsteinen og Sunnhordland.

Alle tidsskrift er til utlån, med unntak av det til ein kvar tid siste nummeret.

Tusen vårar

2008-04-14T14:49:00.001+02:00

Fleirbindsverket "Tusen vårar" av Johannes Heggland er no fullført og utgjeve. Forfattaren døydde diverre i januar i år. Han skreiv ei stor mengd romanar, og var og er svært populær. No kan du låne "Tusen vårar: Vårherres urtegard" på biblioteket. Dette er historiske romanar med handling frå Sunnhordland. Sjekk i katalogen frå heimesida om boka er utlånt.

Innføring av purregebyr på lånt materiale

2008-04-14T14:00:00.000+02:00

Austevoll folkebibliotek har hittil ikkje hatt purregebyr på bøker og anna materiale. Det einaste har vore "overdagspengar" ved lån av video, som har kosta lånaren kr. 5,- pr dag utover lånetida på 1 veke. No vert det i tillegg innført generelt gebyr for for seint innlevert materiale, som gjeld alle andre typar av biblioteket sitt materiale. Saka skal godkjennast politisk den 17. april, og etter det må du nok finne deg i å betale purregebyr dersom du ikkje leverer i tide. Den første purringa er dog berre ei påminning, og vil ikkje koste deg noko. Dei øvrige satsane vil framgå av biblioteket sitt lånereglement. Om du ikkje er ferdig med å lese boka/bruke materialet kan du ringe eller sende e-post til biblioteket for å fornye lånet. Har du fått din eigen kode, kan du og fornye låna dine sjølv frå "Søk i katalogen/Mine lån" på biblioteket si heimeside. Tropp opp og ta kontakt med biblioteket dersom du i framtida vil administrere dine eigne lån heimefrå.